Йошкар-Ола – Шернур кугорно дене кудал эртыме годым Токтайбеляк селаште верланыше тиде сурткайык фабрик шинчалан вигак перна.
Тудын пашаж нерген предприятийын управляющийже Светлана Николаевна Каменщикова (снимкыште) дене мутланышна.
- Сурткайык фабрикыланна вашке кок ий темеш, – ойлаш тӱҥале С.Каменщикова. – Тудым индивидуальный предприниматель Р.З.Лотфуллин почын. Комбо ден лудо-влакым Килемар районысо Озёрный посёлкысо тыгаяк фабрик гыч кондымо да ашнаш тӱҥалме. Тачылан 7 цехна уло. Кажныштыже 2000 утларак кайыквусо ила. Комбылан муным мунчыктена, муныжым Шернурыш инкубаторыш колтена. Тушеч ик кечаш комбиге-влакым кондена да ужалена. Тыгак шкеат ашнена.
- Мыняр теҥгелан ужаледа?
- Тений кеҥежым кугурак комбо 600 теҥгелан каен. Ик кечашым 150 теҥге дене пуэнна. Кажне кечылан эше 5 теҥге дене ешаралтеш. Тыге кок кечашым 155, кумыташым 160 теҥгелан ужаленна. Вес ийын ак тыгаяк кодеш ала изиш шергештеш, эше раш каласен ом керт.
- Кунам тендан деке кайыквусылан толман?
- Апрель мучаште тӱҥалына да август марте эре ужалена.
- Утларакшым шкендан вел-влак налыт чай?
- Уло республик гыч толыт манаш лиеш. Оптовик-влак ятырын улыт. Южышт кеҥеж гоч ала-мыняр гана налын каят.
Пален нальым: вес ийын лудым ашнаш огыт шоно. «Тудым ужален, кугу парышым ыштен налаш ок лий», – маныт. Садлан кызыт чыла лудым шӱшкылыныт да ужалат. У ий ӱстеллан – сай кочкыш. Ик килограммжым 180-200 теҥгелан пуат. Ик лудыжо кум килограмм утла нелытан. Чыладам пагален вучат.
Кайык фабрикыште утларакшым Токтайбеляк села гыч тыршат. Тыгак фабрикын автобусшо пошкудо районла гычат пашазе-влакым шупшыкта.
Ирина Степанова.
Авторын фотожо.
