Российыште 2010 ий 14-25 октябрьыште эртыше переписьын лектышыже пале лие.
2010 ийысе преписьын данныйже пале лие. 2002 ий дене таҥастарымаште марий-влакын чотышт 9,3 процентлан иземын. Лийынна 604 298 еҥ, кодынна 547 605. 56 тӱжем утла еҥлан шагалемынна.
Данный почеш Российыште чылаже 142,9 миллион еҥым шотлымо. 2002 ийысе перепись дене таҥастарымаште, Российын калыкше 2,3 миллион еҥлан шагалемын. Калык утларакшым ялыште чӱдемеш. Тушто еҥ шагал ила гына огыл, шукын ял гыч олашке куржыт. Тыгак изи ола-влакат шагалемыт.
Тичмашын ончалаш гын, Россий тӱнямбалне калык чот дене кандашымше верыште кая (Бангладеш почеш). Тыгодымак элна «шоҥгемеш». Тачылан россиянинын кокла ийготшо – 39 ий.
Ончычсо семынак калык кугу тӱшка дене Рӱдӧ, Юл кундем да Сибирь федерал округлаште (уло калыкын 61 процентше) ила. 2002 ийысе перепись дене таҥастараш гын, калык Российын 63 субъектыштыже шагалемын, а 20 кундемыштыже шукемын. Уло калыкын 73,7 процентше олалаште верланен.
Российыште ӱдырамаш-влак пӧръеҥ деч 10,8 миллионлан шукырак улыт. Перепись годым 66 205 тӱжем пӧръеҥым да 76 700 тӱжем ӱдырамашым шотлымо (процент шот дене 46,3 да 53,7). Тиде утларакшым пӧръеҥ-влакын ош тӱня дене ондакрак чеверласымышт дене кылдалтын. Келгынрак ончалаш гын, таче кажне 1000 пӧръеҥлан 1163 ӱдырамаш логалеш.
Ирина Степанова.
Умбакыже – газетыште.
