«Кугарня» газетым ешге лудына. Сандене ешем нерген возен колташ шонен пыштышым. Ме Пермь кундем Суксун район Кызганде ялыште илена.
Ешна кугу огыл. Ачам – Валерий Петрович Васюков, авам – Галина Васильевна, Антон изам ден Валентина акам улыт. Мый шымше классыште тунемам.
Юлия
Ме келшен илена, кажне пайремым ака-изамын ешышт дене пырля эртарена. Кажне ийын ачам Ӱярнялан лӱҥгалтышым сака, мунчалташ кугу курыкым ямдыла. Тыгак ече дене пӱртӱс лоҥгаште кошташ йӧратена.
Изи годсек авам ден ачам мемнан дене марла кутырат, уныкаштымат марий йылмым йӧратышым ужнешт. Авам – «Эр ӱжара» ансамбльын участницыже, шуко мурым пала, шкежат сылнын муралта. Кызыт йочасадыште пашам ышта, марий вургемым поген, кугезынан пӧрт кӧргыжым ончыктышо тоштерым почыныт. «Марий кочкыш», «Марий пайрем» альбомлам келыштарен. Шочмо йылмым, калыкым йӧратымыжым икшыве-влаклан пуаш тырша. Вет йылмым тунеммын тӱҥ негызшым йочасадыште налына.
Тений районыштына «Идалыкын ешыже» конкурсым эртареныт, тушто ме «Эн сай марий еш» номинацийыште сеҥенна.
Чаманен каласыман, таче марий калык шке йылмыж деч, марий улмыж деч вожылеш. Мемнан школыштат шукынжо марла огыт мутлане. Мый «Народоведений» кружокыш коштам, сандене изирак шымлымаш пашам эртаренам. Кӧ могай еш гыч да могай йылме дене мутлана? Йодышт лекмек, тыгай иктешлымашым ыштышна: 69 процент йоча – марий, 9 – руш, 22 – варналтше еш гыч. Шукынжо шочмо йылмышт дене огыт мутлане, но умылат. Икмыняр ава-ача йочажлан марий йылмым ынеж туныкто, оккӱллан шотла.
Юлия Васюкова.
Кызганде школ.
Умбакыже – газетыште.
