Пошкырт кундем Калтаса районысо Амчемучаш ялын эргыже, пел курымым школлан пӧлеклыше да шочмо ялысе школын ондакысе директоржо Виктор Иванов нерген шуко ойлаш лиеш. Туныктымо жапыштыже ятыр пайдале пашам ыштен да кызытат ты сомылжым шуяш тырша.
Шке ялысе шымияш школ деч вара, 1951-1955 ийлаште, рвезе Краснокам (Эльян) педучилищыште тунемеш. Савакмарий шымияш школышто математикым, химийым, физикым туныктен, пионервожатыйлан ыштен. Татар яллаштат тунемше-влакым пионерыш пуртен, тӱмырым, горным шокташ туныктен.
«Тудо жапыште пионервожатый пашам яра ыштенна. Туге гынат уло кумылын шке сомылнам шуктенна. Йоча-шамыч дене тӱрлӧ мероприятийым эртаренна», – шарналта Виктор Алексеевич.
Мераҥ ялыште икмыняр жап туныктымек, Мӱндыр Эрвелыш армийыш наҥгаят. Туддеч вара Актыган тӱҥалтыш школышто тыршен. Кумшо классым туныктен, тыгодым кугурак класслаште зоологийым наҥгаен.
«Директорын пелашыже Амиева (лӱмжым ок шарне) труд предметым туныкташ темлыш. Йоча-шамычым мланде пашалан кумылаҥдаш пижым, – мутланымашым шуя туныктышо. – Вара 1959-1964 ийлаште кӱшыл шинчымашым налаш Йошкар-Оласе пединститутыш кайышым. Марий ден историй пӧлкаште Чимаев, Ситников дене пырля тунемна».
Вера Гордеева.
Умбакыже – газетыште.
