Кодшо арняште Урал кундемысе Арти район пайремлан поян лийын. Изи Тавра ден Пагышал ял-влаклан 250 ий темын да ты районысо краевед-влакын слётышт гӱжлен эртен.
Тора верыште илыше марий калыкым саламлаш Кугыжаныш Думын депутатше, Мер Каҥашын председательже Лариса Яковлева миен. Пайрем кечым Изи Тавра школышто тӱҥалыныт. Туныктышо-влак тора уна-шамычым кинде-шинчал дене вашлийыныт. Чыланат слётлан ямдылалтме пашам кӱкшын аклышт. Туныктышо-влак Урал марий-шамычын тӱрлӧ кочкышыштым, кидпашаштым, модышыштым, илыш-йӱлаштым ончыктеныт, школ тоштер дене палымым ыштеныт. Слётыш погынышо-шамычым марий-влакын кумалме верышкышт – Кӱсӧ курыкыш – намиен коштыктеныт.
Тиде марий ялыште шочмо йылмым тунемдымаш шуко умылыдымашым луктеш. Историйым, тӱвырам, йылмым тунемде, калыкетым кузе вияҥдет? Тушто тӱрлеман марий вургемым чият, марла мутланат, кугезыштын илыш-йӱлаштым аралат, а школышто гын йылме да литература дене шинчымашым огыт пого.
Свердловск областьын образований министрже Юрий Бикмурзинын (тудо Красноуфимск район Кӱшыл Пугалыш марий ялын шочшыжо) мутшо почеш, кажне айдеме шке веражым тунемшаш да вес калыкымат тидын дене палдарышаш. Мемнан чимарий йӱлана нерген марий-влак веле огыл, пошкудынат палышаш улыт. Сандене йылмым, литературым да калыкнан историйжым кажне марий школышто тунемман.
Шукышт шочмо йылме огеш кӱл, уто предмет манын шонат. Сандене Лариса Николаевна ава-ача-влак денат шинчаваш мутланен, марий йылмын кӱлешлыкшым умылтарен да марий йӱлам, марла кутыртышым арален кодымылан таум каласен.
Икымше ошкыл семын Мер Каҥашын председательже кокымшо класслан «Марий йылме» книгам пӧлеклен. Ты верысе кугыжаныш кучем могырымат полыш лийшаш, сандене икымше сентябрь гыч йоча-влак шочмо йылме дене шинчымашым погаш тӱҥалшаш улыт.
Тыгодымак калык ял пайремым палемден. Шуко уна, ӧрдыж велыш илаш куснышо-влак шочмо ялышкышт погыненыт. Ваш-ваш пӧлекым пуэден, муро сем почеш тавалтеныт. Спорт таҥасымаш-влак икте почеш весе лийыныт.
Чевер кече пайрем кумылым нӧлтен, шыратен ончен. Марий шӱлышан тысе калыкым эшеат чот пеҥгыде лияш да кугезынан йӱлажым аралаш кумылаҥден.
Вера Гордеева.
Авторын фотожо.
